Adresse er ei stadtilvising.

Etter matrikkellova § 12 har kommunen ansvaret for tildeling av vegadresse til adresseobjekta m.a. for at ambulanse, brannvesen, politi, drosjer osv.lett skal finne fram til det aktuelle bygget/inngangen til ein adressat. 

Kommunane Austrheim, Fedje, Gulen, Lindås, Masfjorden, Meland, Modalen og Radøy er etablert som eitt adresseringsområde. Dvs. at adressetildeling og –endring innanfor dei 8 kommunane skjer etter same og samordna system og regelverk. Alle adressene er derfor unike innanfor dette området.

(Osterøy og Vaksdal er eigne adresseringsområde.)

Namnsetting av vegar som kryssar ei kommunegrense, vert samordna med nabokommunen. Det same gjeld nummereringa av adresseobjekta langs slike vegar. (Gjeld alle kommunane).

Adresser skal verte tildelt bygning som vert brukt til bustad-, fritids-, nærings- eller offentleg formål, men kan også verte tildelt anna verksemd og ubygde eigedomar.

Adresseobjekt skal tildelast adresse til den vegen/gata bygningen/inngangen har lovleg køyrande tilkomst frå. Der dette ikkje er fastlagt, skjer tildeling ut frå kva som vil vera rasjonelt i høve til ukjende som skal finna fram og topografiske tilhøve.

I bygg med fleire bustader/lokalar og der desse har tilkomst frå ulik ytre inngang/oppgang i huset, skal kvar enkelt inngang/oppgang tildelast eiga adresse. Der det er fleire bueiningar med same vegadresse, vert kvar bueining i tillegg tildelt kvart sitt husværenummer som del av den offisielle adressa (offisiell adresse er heile den adressa som er registrert i matrikkelen)

Bokstav i tillegg til sjølve nummeret vert brukt for å unngå talendring for tidlegare tildelte vegadresser. Bokstav skal vera i storbokstavform. Ved bruk av bokstav skal alle adresser med same nummer ha bokstavtillegg, altså  12 A, 12 B osv.

Ei vegadresse kan også bli tildelt eit adressetilleggsnamn, jf. adresseforskrifta § 54. Den som ønskjer eit adressetilleggsnamn kan søke kommunen om å få tildelt det. Tilleggsnamnet må vera i samsvar med reglane i § 54 i matrikkelforskrifta.

Også private vegar og område kan kommunen namnsette som eigne adresseparsellar eller innlemme i adresseparsellar som i hovudsak er offentlege vegar.

Kven kan be om å få tildelt vegadresse.
Fylkesmannen kan be kommunen om at vegadresse vert tildelt. Kommunen kan sjølv gjera vedtak om etablering av adressesystem for heile eller deler av kommunen og følgja opp med tildeling av vegadresser til aktuelle adresseobjekt.

Saksgang
Til vanleg tek kommunen initiativ til tildeling av adresse for eksisterande adresseobjekt. Kommunen har òg faste rutinar for tildeling av vegadresse til nye adresseobjekt i dei områda av kommunen vegadressesystem er etablert. Det same gjeld òg for endring av vedteke vegadresse.

Etablering av ny adresseparsell og tildeling av adresse til denne.
Ut frå dei lokal retningslinene (tilgjengeleg på kommunens heimeside) fremjar adresseforvaltinga forslag til namnsetting av ny adresseparsell når det oppskår behov for slik etablering. Utkast til vegnamn vert lagt ut til høyring før kommunestyret eller delegert politisk organ vedtek namnet som adresseparsellen skal ha.

Når adressenamn er vedteke, utarbeider adresseforvaltinga sitt forslag til nummerering av adresseobjekta som skal høyre til parsellen. Dette vert så lagt ut på kommunen si heimeside. Nummereringa av adresseobjekta skjer i samsvar med retningslinene i Statens kartverk sin adresserettleiar. (sjå side 21-36)

Eventuelle merknader til det publiserte utkastet vert vurdert. Deretter gjer kommunen vedtak om kva nummer det einskilde adresseobjektet skal ha og sender vedtaket og tiløyrande informasjon til adressehavaren.

Eg skal bygga i eit område der det er tildelt adresse.
Når får eg tildelt adresse til huset mitt?
Dette vil du normalt få samstundes med godkjenning av byggemeldinga.

Eg er misnøgd med den adressa eg er tildelt.
Korleis går eg fram for å få omgjort vedtaket?
Når kommunen sender ut eit vedtak om tildeling av vegadresse, opplyser kommunen om gjeldande klagereglar. Kort fortalt. Du kan:

• ikkje klage på kommunen sitt val av vegnamn. Her er det berre klagerett på den vedtekne skrivemåten av namna for dei som i følgje stadnamnlova har slik klagerett. Klage etter stadnamnlova har heilt spesielle reglar ulik dei som gjeld elles i forvaltinga. (Eit namnevedtak kan berre omgjerast av vedtaksorganet.)

• klage på kva nummer du er tildelt og på kva adresseparsell du er tildelt nummer til

Skilting av adressesystemet.
Kommunen har ansvaret for at adressesystemet vert tilfredsstillande skilta og at det vert brukt godkjende skilt til dette.

Kommunen fastset plasseringa av alle offentlege adresseskilt (vegnamn-, tilvisings-, kvartals- og områdeskilt). I tillegg kostar kommunen oppsettinga og vedlikehaldet av desse med unntak av dei skilta Statens vegvesen har ansvaret for. Det gjeld alle offentlege adresseskilt langs riks- og fylkesvegar.

Adresseeigar har ansvaret og ber kostnadene med å få på plass og halde vedlike adressenummerskilt og turvande tilvisingsskilt på eigen eigedom.

Branntilsynet i kommunen fører tilsyn med skiltinga og rapporterer manglar til adresseforvaltar i kommunen som syter for at påpeikte manglar vert retta. Gjeld dette skilt som private eller Statens vegvesen har ansvar for, får dei melding om mangelen og rimeleg frist til retting. Kommunen kan retta manglar på den ansvarlege for retting sin kostnad der pålegg ikkje vert fylgt opp tilfredsstillande.

Endring av tildelt adresse.
Kommunen kan endra ei tildelt adresse når det oppstår behov for det. Før kommunen gje vedtak om endring av tildelt adresse, vert adresseeigar kontakta av kommunen og forklart kvifor det er aktuelt med endring av adressa. Deretter gjer kommunen endringsvedtak od sender eigar melding om dette.

I slike tilfelle er det vanleg at kommunen gjev eller betalar adresseeigar kostnadene med kjøp av nytt skilt.

På vedtak om adresseendring er det klagerett etter matrikkellova § 46. Framgangsmåte etter kap IV-VI i forvaltingslova.

Alle spørsmål du har om tildeling og endring av tildelt adresse, om adresseskilt/-skilting, om saksprosedyrar m.v. kan du retta til kommunen.